Wayang Windu, Wisata Alam Murah tur Tumaninah – Wasunda

Kabupatén Bandung tara béakeun wisata alam anu éndah. Aya Ciwidéy, Majalaya, nepi ka Pangaléngan. Teu héran upama Bandung jadi tujuan anu ngadon sukan-sukan pakansi, boh wisatawan daérah atawa luar daérah.

Pangaléngan jadi salah sahiji destinasi wisata di daérah Kabupatén Bandung anu ramé waé unggal poé peré. Tempat anu lobana dieusi ku kebon ntéh nu ngalantarankeun Pangaléngan tara sepi pangunjung. Ti mimiti Situ Cileunca, Situ Cisanti, Cukul, Pamandian Cai Panas katut villa-villana.

Salah sahiji déstinasi wisata anu aya di Pangaléngan anu ayeuna keur meujeuhna ramé téh nyaéta Wayang Windu Panénjoan. Loba wisatawan boh anu jeung kulawarga atawa barudak ngora anu sukan-sukan pakansi ka Pangaléngan.

Wayang Windu Panénjoan mangrupa salah sahiji wisata alam anu ngagambarkeun kaéndahan kebon ntéh anu aya di Pangaléngan, Kabupatén Bandung. Tempat wisata anu aya dina ketinggian 1800 mdpl, anu matak hawana seger tur tumaninah. Héjo lémbok dangdaunan, rajegna tutuwuhan nambah nikmat ka anu ngadon pakansi.

Wayang Windu Panénjoan anu masih hiji kawasan jeung Wayang Windu Mountain Bike Park anu mangrupa kawasan olahraga, hususna anu ngadon sasapédahan, komo anu resep kana sapédah gunung. Wayang Windu Mountain Bike Park  ogé saacanna mémang geus katelah sabab mindeng dijieun jadi lokasi pasanggiri balap sapédah.

Wayang Windu Mountain Bike Park ogé miboga sababaraha trék saperti, Cross Country (XC), All Montain (AM), nepi ka Mini Downhill (DH). Anu kurang leuwih panjang trékna téh 15 kilométer.

Salian bisa jadi spot poto anu alus, di Wayang Windu Panénjoan ogé loba anu ngadon botram jeung babaturan atawa kulawarga. Sabab tuang bari ninggali éndahna kebon ntéh matak ponyo kana tuang. Liwet, goréng asin jeung sambel ogé matak ponyo dituang babarengan, komo disimbutan ku tirisna halimun luhur gunung.

Lokasi Wayang Windu Panénjoan aya di Banjarsari, Pangaléngan, Kabupatén Bandung. Anu kurang leuwih 60 kilométer ti puseur dayeuh Kota Bandung.

Asupna ogé ngan saukur mayar Rp. 10.000. geus bisa popotoan sawaregna. Bari ninggali kebon ntéh anu upluk-aplak satungtung deuleu. Komo deui dibarengan ku bébéndé, nambahan karomantisan.

Penulis : Agung Apryan