Warna Anyar The Panturas Liwat Lagu “Balada Semburan Naga” – Wasunda

Foto: Instagram @thepanturas

Wasunda, Trénd – Band Surf-Rock kontémporér asal Jatinangor, The Panturas ngaluarkeun single anyar dina tajuk “Balada Semburan Naga” dinten Juma’ah kaping 13 Nopémber 2020.

Naha beut Surf-Rock kontémporér? Ku sabab Surf-rock nu ku urang wanoh nyaéta surf-rock nu teu nganggo vokal. Candak conto gampang misalna Dick Dale, band surf-rock atawa rock selancar ieu teu nganggo vokal di lagu-laguna.

Janten kontémporér hartosna, The Panturas ngasupkeun nuansa anyar dina génré rock selancar éta nyalira, nyaéta tambihan vokal dina laguna.

Cag, ayeuna urang bahas “Balada Semburan Naga”. Lagu ieu jigana mah béda jeung matéri nu pernah The Panturas bawakeun sateuacanana. Sapertos dipikaterang, The Panturas biasana mawakeun matéri pasualan laut jeung basisir.

“Tenggelamkan” atawa “Fish Bomb” misalna, ti judulna gé geus jelas, pasti bahasannana ka pasualan basisir jeung laut. Tenggelamkan nu nyaritakeun kategesan mantan Menteri Kelautan Susi Pudjiastuti nu wani neuleumkeun kapal laut nagara batur nu rék asup ka pabatasan nagara urang.

“Balada Semburan naga” leuwih ka nyaritakeun pasualan urang balaréa. Bener pisan, pasualan cinta jeung masa depan nu diatur ku kolot pasangan. Yén saurang lalaki lamun hayang ngadekeutan awéwé kudu boga titel pagawé PNS atawa jadi bagéan korporasi BUMN.

“Ieu lagu sabenerna jang para lalaki nu ditolak ku kolotna ku sabab lain bagéan ti PNS atawa BUMN,” ceuk Abyan, vokalis The Panturas nalika ditanya di Vlogcast Terbonyokan di Plaform Spotify.

Abyan (Vokal), Rizal (Girar), Bagus Gogon (Bass), sareng Surya Fikri atawa Kuya (Drum) berhasil nyieun warna nu béda di lagu “Balada Semburan Naga” nu karék diupload 15 jam ieu bisa tembus 12.000 leuwih panongton di YouTube.

Ditambah kolaborasi ti Adipati “The Kuda” nu boga karakter khusus dina vokalna jadi nambahan warna si The Panturas éta. Vokal Adipati nu nyelenéh, lamun ceuk basa urang mah “polontong”na beunang pisan di lagu ieu.

Kanggo wadya balad WaSunda nu tacan ngadangu lagu “Balada Semburan Naga”, ieu bisa jadi pangeunteung yén lagu ieu jadi hiji répréséntatif ti kahirupan pajodohan nu tungtungna saukur “rék jadi naon manéh di masa depan?”