Wali Kota Bandung Ngadukung Prosés Uji Klinis Vaksin Covid-19 Fase Katilu – Wasunda

Foto: humas.bandung.go.id

Wali Kota Bandung, Odéd M. Danial ngadukung prosés uji klinis vaksin Covid-19. Salian tos ngaliwatan prosédur penelitian nu tos kedahna, uji klinis sarupi kieu gé sanés hal nu anyar.

Dukungan éta didugikeun wali kota saatos parepang sareng Tim Peneliti Uji Klinis Vaksin Covid-19 nu dipingpin ku Prof. Dr. Kusnandi Rusmil, dr.,Sp.A(K)., MM. ti Universitas Padjadjaran (Unpad) di Balai Kota Bandung, Senin (27 Juli 2020). Salian Kusnandi Rusmil, Tim Peneliti Uji Klinis Vaksin Covid-19 nu dongkap dina agénda ieu nyaéta, Dr. Eddy Fadlyana, dr.,Sp.A(K).,MKes. sareng Rodman Tarigan, dr., Sp.A(K)., MKes.

Wali kota nyarios yén Unpad sareng Biofarma nu mangrupakeun perusahaan plat beureum produsén vaksim, tos sering ngalaksanakeun uji klinis vaksin nu ngalibatkeun warga Kota Bandung.

“Margi ieu téh mangrupakeun program nu masihkeun mangpaat kanggo warga Bandung sareng Indonésia tangtu kami ngadukung pisan program ieu. Saleresna, vaksin ieu mayoritas dilaksanakeun di Kota Bandung panalungtikanna. Hartosna (program) ieu tos biasa,” saur Mang Odéd, dikutip ti situs resmi Humas Kota Bandung (28/7/2020).

Ayeuna, margi vaksin nu diujikeun nyaéta kanggo nyegah pandemic global di Indonésia. Kaleuwih ieu mangrupakeun mandate langsung ti Présidén RI Joko Widodo, ku kituna walikota ngarasa kedah terjun langsung mastikeun prosés uji klinis ieu lumangsung saé ogé lancer.

“Saleresna ti baheula gé Biofarma tos biasa (ngalakukeun uji klinis), tapi (laporanna) paling mung dugi ka kepala dinas. Margi ieu (virus) corona sareng ti Pa Présidén, nu jadina Mang Odéd salaku wali kota kedah terang,” saur Mang Odéd.

Sapertos nu dipikaterang, uji klinis ieu bakal diousatkeun di genep tempat, nyaéta Rumah Sakit Fakultas Kedokteran Universitas Padjadjaran, Balai Keséhatan Universitas Padjadjaran, Puskésmas Dago, Puskésmas Sukaparkir, sareng Puskésmas Ciumbuleuit.

Saur Prof. Kusnandi Rusmil salah saurang ti tim uji klinis, dugi ayeuna tim panaluntik masih ngantosan surat persetujuan ti Komite Étik kanggo ngawitan pangujian. Pami surat ieu tos terbit, ku kituna tim panalungtik bakal mulai ngabuka pendaftaran kanggo rélawan nu hoyong ngiring uji klinis. Saseueur 1.620 rélawan dibutuhkeun dina uji klinis fase katilu.

Para rélawan nu bisa ngiring uji klinis nyaéta, jalmi nu yuswana diantara 18-59 taun ogé gaduh kondisi fisik nu saé. Aranjeunna bakal diparios ku dokter spésialis panyakit jero sateuacan dipasih suntik vaksin. Saatos éta tim panalungtik bakal mantau kondisi kaséhatan rélawan salila 6-8 sasih.