Vespa: Kungsi Pareum, Ayeuna Hurung Deui. – Wasunda

Sorot motor Vespa nu kungsi pareum, ayeuna hurung deui. Salian ti jadi transportasi, ayeuna Vespa jadi koleksi pecinta motor klasik di sakuliah dunya. Motor kolot jenis skuter ieu mémang unik tur langka, nu matak jadi barang anu mahal jeung diboro ku réa jelema. Tangtu loba pisan hal anu ngalantarankeun Vespa bisa eksis nepi ka kiwari.

Vespa boga sajarah di Indonesia

Indonesia mangrupa nagara anu masih kénéh loba pecinta Vespa, malah bisa kasebut pabalatak. Salah sahiji Vespa anu gandrung di Indonesia nya éta Vespa Kongo. Dina sajarahna, ngaran Vespa Kongo dicokot tina ngaran tempat TNI Kontingen Garuda  anu mancén tugas di Kongo. Pamaréntah ngahadiahkeun ieu Vespa ka TNI anu tugas di Kongo minangka simbol pangajén kana jasana.

Vespa amis jeung ngartis

Vespa mindeng tampil dina pilem-pilem. Bentukna anu elegan jadi hal anu ngirut keur dijadikeun mamanis dina pilem. Salah sahiji pilem Indonesia anu mangaruhan popularitas Vespa ayeuna nya éta Bike Boyz. Ieu Pilem garapan Aris Nugraha (Bajaj Bajuri, Preman Pensiun)  nyaritakeun kahirupan barudak Vespa anu dibungkus ku gaya drama komedi. Pilem Bike Boyz bisa kasebut sukses ngaramékeun deui pervespaan di kalangan kaula muda, husuna di Indonesia. Salian ti jadi mamanis dina pilem, Vespa ogé loba dipaké jeung dikoleksi ku artis boh nasional boh internasional. Artis Indonesia nu maké Vespa diantarana nya éta Sule, Andre Taulany, Raffi Ahmad, Dik Doank, jrrd.  Sabab tampil waé dina pilem jeung dipaké ku artis, pola pikir masarakat ogé kapangaruhan ku tren yén Vespa jadi barang anu keren dibandingkeun motor séjén.

Hasil kreativitas jeung solidaritas

Vespa dihartikeun dina basa Italia mah nya éta éngang atawa lebah. Bentuk awak Vespa ogé memang sarupa jeung éngang, mangrupa hasil tina kreativitas tinggi. Salian ti éta, di Indonesia mah loba pisan komunitas pecinta Vespa anu ti taun ka taun jumlahna tuluy ningkat. Solidaritas tanpa batas jadi silokaning hirup komunitas barudak Vespa di Indonesia.

Éta sababaraha hal  anu mangaruhan eksistensi  Vespa. Motor jieunan Eropa ieu téh geus  kawéntar kamana-mana, malah geus dijadikeun gaya hirup mewah. Jadi, keur saha waé anu boga karesep kana motor klasik jeung antik, Vespa bisa dijadikeun transportasi atawa koleksi.