Ulah Sagawayah Maling Di Bong – Wasunda

Ilustrasi: sesawi.net

Di mangsa pandemi virus nu teuing iraha bérésna. Teu saeutik jalma nu kasusahan, mulai ti susah néangan dahar, néangan gawéan, malahan mah nu di PHK ti perusahaanna. Ku kituna masalah pambagéan santunan ti pamaréntah nu can rata, aya nu dobel meunang bantuan, aya ogé jalma mampu nu masih nampi bantuan. Anéhna, ai jalma nu sarusah malah teu kadata.

Tindak kriminal sapertos ngabégal, maling, jeung sajabana malahan mah jadi ningkat gara-gara bantosan nu teu rata ieu. Rék kumaha rata, loba pisan pamaréntah daérah nu culas, nu akhirna loba warga nu kapaksa ngalakukeun tindak kriminal. Sok bayangkeun, euweuh pandemi waé gé tindak kriminal di nagara ieu geus loba, komo deui datangna pandemi, katambah bantosan nu teu rata.

Hiji carita datang ti si Maman, pamuda nu asalna usaha dina ngaréntalkeun PS ieu kapaksa ditutup. Atuh da enya, ai di réntal mah geus pasti unggal jalma saling cepeng stik PS, padeukeut, ah bahaya wéh pokonamah. Manéhna geus lieur kudu kumaha deui nyanghareupan pandemi ieu, tutupna réntal PS nu nyieun manéhna jadi ngajual kabéh PS jeung TV nu aya di réntalna, duitna béak. Da anak 4 nu masih laleutik kénéh, katambah biaya sapopoé hirup manéhna.

“Ah lieur aing, kudu kumaha deui ieu?,” ceuk si Maman bari ngalamun di téras imahna.

Bari ngalamun, manéhna bari néangan cara kumaha sangkan manéhna bisa ngahirupan pamajikan jeung kaopat budakna.

“Oh heueuh, pan di dekeut perum imah ieu téh aya Bong, da di Bong mah pasti loba perhiasan di jero kuburanna,” ceuk manéhna.

Bener, ai Bong téh nyaéta astana khusus urang Kristen, pan pami urang Kristen komo nu dikuburkeun di Bong mah pasti reunceum ku perhiasan si jenazah na téh, da bagéan ti budaya téa. Nu jadina si Maman kapikiran nyokotan perhiasaan ti jero peti jenazah nu aya di Bong.

Atuh teu lila, nalika tengah peuting manéhna ngalakukeun aksina nyokot perhiasan nu aya di jero peti. Ngabébélaan ngawanikeun manéh ka Bong tengah peuting, mamawa pacul jang ngagali kuburan.

Cag! Sababaraha perhiasan berhasil dicokot, isukanana manéhna langsung ka toko emas jang ngajual hasil malingna, teu saeutik. Manéhna meunang mangjuta-juta ti hasil nyokot perhiasan ieu.

Sababaraha poé sanggeusna, Maman gering, manéhna rumasa sok diganggu ku jenazah-jenazah makam nu ku manéhna cokot perhiasanna. Malahan mah aya hiji jenazah nu kakonfirmasi virus nu akhirna manéhna jadi positif beunang virus nu keur ayeuna ramé.

Maman ayeuna positif virus, katambah hirupna kasiksa da dijungjurigan waé. Tah kitu, ulah sagawayah nyokotan barang batur, komo nu geus maot mah!