Seueurna Calon Tunggal di Unggal Daérah Jadi Bukti Démokrasi nu Teu Séhat – Wasunda

Foto: infopublik.id

Sajumlah calon tunggal di 31 daérah diprédiksi gaduh poténsi kanggo ngalawan kotak kosong di mangsa Pemilihan Kepala Daérah (Pilkada) Serentak sasih 9 Désémber 2020 nu bakal datang.

Dumasar ti siaran pérs info publik, Guspardi Gaus salaku Anggota Komisi II DPR ngaku prihatin ningal kondisi ieu. Margi calon tunggal di unggal daérah ieu dugi ka 31 daérah, sanés jumlah nu sakedik. Nu jadina malah janten moméntum nu kirang saé ningal nagara urang nyaéta nagara nu ngajunjung démokrasi.

“Ieu saur abdi mangrupakeun présedén kirang saé dina rangka pendidikan politik sareng pendidikan démokrasi,” saur Guspardi di katerangan pérsna (11/8/2020).

Guspardi nyarios yen Pilkada nyaéta kompetisi ngeunaan visi sareng misi antar pupuhu daérah. Seueurna calon tunggal ieu nyababkeun teu kawujudna substansi Pilkada.

“Margi nu disanghareupanna kotak, kotak hartosna anjeunna teu gaduh otak, anjeunna teu gaduh visi ogé misi, padahal urang gaduh penduduk nu seueur, kaopat pangseueurna di dunya,” saurna.

Ku kituna, ayana kamungkinan calon tunggal di 31 daérah ieu ngabuktikeun yén upaya kanggo ngalakukeun pendidikan politik sareng démokrasi tos ngalaman pasang durut dina milih pamingpin mangsa ka payunna. Ogé hal ieu jadi patanda démokrasi ieu teu séhat.

Anjeunna nyarios kedah aya terobosan nu dilakukeun liwat undang-undang nu aya kakaitna sareng Pilkada atawa Pemilu. Fénoména calon tunggal nu maju nyalira atawa nyanghareupan kotak kosong di Pilkada nambihan daftar ‘culas’ nu ngadampak kirang saé kanggo démokrasi ieu.

Guspardi ngadesak supados cara ieu teu dilakukeun pami hoyong ngawangun daérah nu langkung saé.

Anjeunna gé nyebatkeun yén éléh atawa meunang teu tiasa dijadikeun ésénsi utama di lebet Pilkada. Tapi, ngahadirkeun khazanah démokrasi nu lurus tur bersih sangkan kacipta pendidikan politik masarakat nu saé nyaéta ésénsi nu saleresna. Tujuanna ti sadaya ieu nyaéta kasejahteraan masarakat.

“Beuki seueurna calon tunggal tanda démokrasi nu teu séhat. Nurunkeun threshold kanggo Pilkada ieu salah sahiji cara, syarat 5-10 persén korsi tos cekap. Éta ngamudahkeun seueurna partai nyalonkeun pasangan. Urang isin, maénya nu jadi lawan sanés nu gaduh otak, tapi malah kotak,” pungkasna.