Sémiotika Dramatika – Wasunda

Carita diadaptasi ti Puisi Sémiotika Dramatika nu aya di Kumpulan Puisi Menulis Dalam Gelap Karya Iman Setiawan (Imanbonyok) nu jadi bentuk prosa atanapi carita.

Hiji mangsa, di kampus nu kacida raména kuring diuk di bangku biru. Leres, bangku biru nu jadi saksi cinta kuring ka si Nada. Nada nu jadi kadedeuh kuring ti mimiti kuliah, nepi ka iraha waé gé kuring bakal bogoh ka si Nada. Lain saukur parasna nu geulis, tapi kalakuanna ogé geulis, tur bahasana gé nu lemah lembut nu matak kuring beuki bogoh ka si Nada.

Mangsa éta, kuring ribut jeung Nada. Ribut gédé, éra kuring ditingalikeun mahasiswa nu aya di bangku biru. Tapi da kumaha, kakesel teu bisa ditahan. Kuring ribut gara-gara ningali si Nada keur paduduaan jeung lalaki batur di hiji tempat terus diposting di igstory.

Kuring ngadat teu walakaya, aambekan nepi kaluar kecap-kecap nu aya di kebon binatang. Timburu kuring geus ngéléhkeun kakesel kuring ka si Nada. Kunaon manéh téh bisa kitu ka kuring Nada? Kunaon? Kuring émang salah, teu bisa jadi lalaki nu bener, tapi lain kieu carana. Lain ku salingkuh carana. Nada ngaku yén kuring salah. Kuring teu bisa jadi lalaki nu ngabagéakeun manéhna, teu bisa unggal poé ngabales chat-na, teu bisa jadi lalaki nu ngabaturan manéhna kamana waé manéhna indit. Nu tungtungna manéhna ménta hampura gara-gara- kasalahan kuring. Kuring gé ménta hampura da manéhna gé ménta hampura ka kuring.