Seblak Seuhah! – Wasunda

Foto: wikipedia

Seblak Bandung jadi dahareun populér di éra tahun 2000-an. Di awal kamunculanna, seblak ieu aya dua jenis, diantawisna seblak garing sareng seblak baseuh. Harita, seblak ogé ngan kasohor jadi dahareun sisi jalan hungkul. Tukang seblak, dagangna mung sederhana dina roda.

Dina unggal cara ngadamel seblak nu anjeun terang, bumbu nu dianggo pastina aya campuran cikur jeung céngék. Kukituna, seblak dikenal jadi dahareun nu lada, tur seuhah! Salajengna, anjeun kedah merhatoskeun jenis kurupuk nu dianggo. Teu sadayana kurupuk tiasa didamel janten seblak.

Nu pastina, kurupuk aci, atawa kurupuk konéng, nu kasohorna mah kurupuk mérek sumber sari tah. Éta kurupuk bisa jadi pilihan awal lamun urang rék ngadamel seblak.

Teras makroni, ieu bahan bisa jadi gegentos kanggo aranjeun nu alim nganggo kurupuk dina ngadamel seblak. Bahan makroni nu hipu ogé legt pas didamel jadi seblak, ieu jadi salah sahiji pilihan alternatif kanggo aranjeun nu hoyong nyobi seblak vérsi makroni!

Salian ti bahan utama nyaéta kurupuk atawa makroni, seblak kirang lengkep lamun teu nganggo endog, boh éta endog kacuk atawa endog nu dikocok dina panggodogan nu dihijikeun sareng kurupuk atawa makroni. Endog jadi salah sahiji bahan nu wajib jang ngadamel seblak!

Ogé aya toping palengkap nu pastina ngadamel seblak ieu jadi variatif. Aranjeun tiasa nyampurkeun seblak ieu ku cékér, tulang, atawa suir hayam nu pastina jadi ngeunah tur nikmat. Salian éta, toping sapertos baso, sosis, jsb teu éléh nikmatna!

Dugi ka ayeuna, seblak jadi seueur rupina. Aya nu bahan mimitina ku mie, aya ku mie golosor, aya ogé nu ku kwétiauw. Étamah kumaha séwang-séwang resepna nganggo bahan mimiti nu mana. Nu pasti mah lada tur seuhah.

Dina danget ieu. Wasunda.com ngarékoméndasikeun 5 jajanan seblak favorit di kota Bandung, diantawisna nyaéta:

Seblak Jebred nu alamatna di Jl. Buah Batu nomor 184, Bandung

Seblak Basah Deu’ Tjenghar di Babakan Ciamis

Seblak Sultan di  Jl. Sultan Agung nomor 10, Bandung

Seblak Bunda di Astanaanyar

Seblak Abdul di kawasan Cipaganti