Sasapédahan Ogé Badminton Jadi Ménu Tambahan Abdul Aziz – Wasunda

Foto: persib.co.id

Dina mangsa pandemi ogé bari ngantosan gelaran Shopee Liga 1 2020 nu dikawitan deui kaping 1 Oktober 2020 dugi ka 28 Fébruari 2020, ogé bari ngantosan iraha pastina latihan bareng nu diayakeun ku tim. Para punggawa Maung Bandung, gaduh kagiatan nu bisa ngaleungitkeun bosen dina ngantosan sagala hal nu tos disebat bieu.

Salah sahijina nyaéta Abdul Aziz, anjeunna milih kagiatan sasapédahan ogé maén bulutangkis kanggo tetep ngajaga kabugaran awak anjeunna. Kagiatan éta gé janten kagiatan tambahan salian tina ngajalankeun program latihan mandiri nu tos ditangtoskeun pelatih Maung Bandung. Sasapédahan sareng maén badminton bisa jadi kagiatan nu séhat kanggo Abdul Aziz.

Pamaén nomer 8 ieu ngaku yén anjeunna biasa aktifitas sasapédahan sareng maén badminton ieu téh sareng pamaén Pérsib nu sanésna sapertos Erwin Ramdani, Zalnando, Dedi Kusnandar sareng Muhammad Natahir. Sanaos sanés kagiatan rutin, tapi aranjeunna sababaraha kali sok olahraga bareng.

Kagiatan ieu téh lain saukur ngeusi waktu kosong wungkul, tapi ogé kanggo ngajaga kabugaran. Salian bisa jadi variasi latihan, jenis olahraga nu dipilih Abdul Aziz bisa jadi senang margi tiasa olahraga babarengan. Kan resep bisa maén badminton di gor babarengan, teras sasapédahan bareng ka jalan, tapi teu hilap ku protokol kaséhatan kumargi dina mangsa pandemi ieu, kaséhatan tetep nomer 1.

“Variasi latihan hungkul, pami pas waktosna aya kosong. Boasa sareng Erwin, Zalnando atau nu sanésna ogé. Nya, ieu meureun tiasa janten menu tambahan latihan ogé,” saur Aziz nu dikutip sareng disunting kana basa Sunda tina situs resmi Pérsib Bandung (18/7/20).

Aziz gé ngaku yén anjeunna tiasa nganikmati kagiatan sasapédahan supados kénging suasana anyar. Komo di mangsa adaptasi kabiasaan anyar ieu, tim Persib teu acan ngagelar latihan bareng. Janten tambahan menu ieu tiasa jadi solusi ogé rékoméndasi arurang nu bosen dina kagiatan pandemi ieu. Sasapédahan sareng maén badminton tiasa jadi solusi!

“Sabari ngasaan suasana anyar kanggo ngajaga kabugaran, supados teu turun fisikna. Pernah sasapédahan nepi ka Puntang, ieu ayeuna gé nuju sasapédahan ka Tarogong, Garut,” saurna.