Purwakarta Ngadamel Program Unggulan ‘Désa Cerdas’ – Wasunda

Foto: Diskominfo Kab. Purwakarta

Pamaréntah Kabupatén (Pémkab) Purwakarta liwat Dinas Komunikasi sareng Informatika (Diskominfo) terus ngayakeun inovasi. Diantawis inovasina, nyaéta ngaluncurkeun program ‘Désa Cerdas. Di program ieu, unggal désa didorong kanggo nyasuaikeun diri sareng téknologi komunikasi di mangsa ayeuna.

Dumasar Diskominfo Kabupatén Purwakarta Purwakarta, Dra Hj. Siti Ida Hamidah, MM salaku Pupuhu Diskominfo Kabupatén Purwakarta nyarios sajauh ieu pihakna ngupayakeun ngadorong supados wilayah padésaan tiasa janten wilayah nu basisna téknologi sareng informasi. Margi, saurna, émang tos kedahna di éra digital sapertos ayeuna, wilayah désa ieu ngartos internét.

“Tujuan ti program Désa Cerdas, nyaéta supados sagala rupi ngeunaan kaunggulan sareng produktifitas masarakat désa tiasa ditingal ku masarakat luas liwat dunia maya. Nu jadina produk-produk unggulan ieu tiasa dipublikasikeun liwat dunia maya,” saur Kadis Kominfo Ida, dikutip ti Diskominfo Kabupatén Purwakarta (12/8/2020).

Sajauh ieu, Ida salaku pingpinan di Diskominfo Purwakarta, Pémkab Purwakarta ogé tos ngawitan ngajadikeun téknologi informasii jadi média dina masihan palayanan kanggo wargana. Salian ngadorong Désa cerdas, dugi ayeuna gé jajaran di Dinasna ngagagas deui terobosan anyar. Nyaéta, sistem informasi mangrupa wébsite nu didamel khusus kanggo désa.

“Dugi ayeuna, kami siapkeun wébsite Désaku. Layanan nu basisna digital ieu khusus kanggo unggal désa nu aya di Kabupatén Purwakarta. Ieu janten jandéla désa kanggo ngembangkeun peluang liwat digitalisasi,” saurna.

Wébsite ‘Désaku’ ieu difokuskeun kanggo désa ngenalkeun produk unggulan désa liwat dunia maya. Kalebet diantawisna, kanggo ningatkeun informasi ngeunaan désa. Mung, nu langkung penting nyaeta ngabuka peluang paningkatan perékonomian masarakat désa.

“Di Wébsite Désaku, kami ogé nyadiakeun lapak onlén atanapi e-commerce. Supados masarakat tiasa ku gampangna masarkeun hasil produkna. Kanggo pangelolaan Lapak Onlén di wébsite ieu, tanggung walerna aya di BUMDÉS séwang-séwang,” saurna.

Ida nambihkeun yén wébsite Désaku ieu mangrupakeun wébsite resmi désa nu aya di lingkungan Pamaréntahan Kabupatén Purwakarta. Pihakna miharep, wébsite ieu tiasa janten média kanggo pamaréntah désa dina masihkeun informasi kanggo masarakat di éra modern sapertos ayeuna.

“Kami miharep, kahadiran wébsite ieu gé tiasa janten média pamberdayaan masarakat désa dina ilubiung ngenalkeun produk khas sareng produk unggulan ti désa séwang-séwang nu ngkinna bakal dipasarkeun di dunia luar, margi wébsite désaku gé dilengkepan ku fitur lapak onlén/e-commerce,” saurna.