Punggawa Maung Bandung Tetep Ngajalankeun Latihan Mandiri – Wasunda

Dugi ka ayeuna, punggawa Maung Bandung masih teu acan tiasa ngagelar latihan bareng kusabab pandemi Covid-19. Ku kituna, para Pamaén tetep kénging tugas ti tim pelatih kanggo ngajaga kaséhatan sareng sumangetna. Pelatih fisik Persib, Yaya Sunarya nyarios yén pamaén tetep ngajalankeun program latihan mandiri nu salila ieu tos rutin dijalankeun.

Bédana, ayeuna pamaén tiasa leuwih gampang milih menu latihan nu tos ditangtoskeun ku tim pelatih Persib. Kapungkur, di masa Pembatasan Sosial Berskala Besar (PSBB) pamaén dibatas kanggo milih tempat latihan. Mung ayeuna,  Pamaén di masa Adaptasi Kebiasaan Baru (AKB) nu ditangtoskeun ku pamaréntah tiasa bébas milih tempat latihanna ogé métode latihanna.

Dumasar ti situs resmi Persib Bandung, Pelatih fisik Persib Bandung, Yaya Sunarya nyarios yén latihan angger mandiri mung pamaén ayeuna tiasa latihan di luar bumina ku angger merhatoskeun protokol kaséhatan. Pamaén ogé tiasa nangtoskeun waktu nu pas kanggo latihan. Aranjeunna ayeuna tiasa leuwih gampang kanggo milih métode latihanna.

“Latihan angger mandiri. Mung ayeuna mah pamaén tiasa latihan di luar bumina ku angger merhatoskeun protokol kaséhatan. Pamaén ogé bisa nangtoskeun waktu nu pas kanggo latihan. Aranjeunna ayeuna bisa sasapédahan atawa lumpat sareng leuwih gampang milih,” saur Yaya nu dikutip sareng disunting kana basa Sunda ti situs resmi Persib Bandung (14/7/2020)

Saur Yaya, pelatih Roberts Rene Albert gaduh target kanggo anak asuhna di unggal latihan. Anjeunna gé ngajelaskeun métode latihan sapertos aérobik atawa tiasa ku program ti pamaén.

“Leuwih di aérobik. Latihan bisa ku program ti pamaén. Kami ogé masihan arahan ngeunaan program ka pamaén nu ngabutuhkeun,” saurna.