Pemuda Cisaat Siap Gelar Kagiatan 17-an – Wasunda

Sumber ilustrasi: M. Hasanudin

Pamuda téh ujung tombakna kamajuan hiji nagara, tos sakuduna pamuda kompak, gotong royong, sauyunan jeung réréongan ngawangun daérahna séwang-séwangan. Saperti halna anu dilakukeun ku Pamuda Cisaat, Désa Cisaat, Kacamatan Kadungora, Kabupatén Garut. Salahsahiji Karang Taruna Karya, anu pantes jadi conto ku pikeun karang taruna sanésna.

Sapertos anu kantos diucapkeun ku Presidén ka hiji Républik Indonésia, Bung Karno yén pamuda téh faktor utama dina majuna hiji nagara. Dimimitian ku pamuda, dilakukeun ku pamuda pikeun kamajuan sareng kamaslahatan masarakat Indonésia pada umumna. 

Kang Réza Fahlavie salaku Ketua Umum Pamuda Cisaat ngawartoskeun yén Pamuda Cisaat kedah janten pejuang kanggé masarakat Cisaat khususna. Anjeuna ngajelaskeun, maksad pejuang didinya nyaéta nulung kanu butuh, nalang kanu susah. 

“atos janten kawajiban urang saréréa, ngamumulé sareng ngaramékun daérah ku cara anu kréatif. Sapertos naon anu aya dina visi sareng misi Pamuda Cisaat, nyaéta Pamuda Cisaat kedah janten palaku kamajuan daérah sareng janten kabanggaan pikeun masarakat Cisaat.” Saur Kang Réza, ka Wasunda rebo (29/7/2020).

Réza nambihan yén dugi ayeuna anggota Pamuda Cisaat kompak sareng layeut, kantenan mayunan tangal 17 Agustus anu sapertos biasa ngayakeun seueur kagiatan. Ieu janten modal anu saé kanggé nyambut kagiatan 17-an. 

Pamuda pamudi Cisaat timimiti santri, budak jalanan dugi ka budak rumahan sumanget ilubiung kana program anu diajukeun ku Kang Réza salaku Ketua Umum Pamuda Cisaat. Timimiti kagiatan olahraga, kasenian dugika bakti sosial kamasarakatan siap ngaramékeun dina parayaan “hari kemerdékaan” Indonésia anu ka 75 taun. 

Pamuda Cisaat ngusung téma “Bakti Pemuda untuk Masyarakat” kanggé 17 Agustus taun 2020. Téma ieu bakal diaplikasikeun kana sababaraha kagiatan anu produktif, sakaligus ngembangkeun poténsi atanapi bakat Pamuda Cisaat, umumna kanggo sakumna masarakat Cisaat.

“saleresna, barudak Pamuda Cisaat ngagaduhan poténsi sareng bakat anu kedah dituangkeun janten kréatifitas. Ku ayana karang Taruna Karya ieu, kedah janten sarana kanggé Pamuda Cisaat ngembangkeun potési sareng bakat anu aya di masing-masing anggota.” Saur Réza.

Pamaréntah Désa ngadukung sareng ngarojong kana kagiatan anu tos direncanakeun ku Ketua Umum Pamuda Cisaat. Saurna, Pamuda Cisaat tiasa dijantenkeun conto kanggé Karang Taruna anu aya di daérah sanés. 

“teu aya deui anu langkung ngabanggakeun pikeun masarakat, iwalti pamudana anu aktif, kréatif sarng produktif kana hal-hal anu positif.” Saur Pak Ruhiat salaku Pupuhu Désa Cisaat.

Kumargi kondisi kiwari nuju aya wabah, karang taruna tetep kedah merhatoskeun protokol kaséhatan, saur Pak Kadés nambihan, Rebo (29/7/2020).