Ngan di Kedai Kopi Ieu Ibu-Ibu Bisa Nawar! – Wasunda

Foto: Iman Setiawan

Gelora Fantasi, salah sahiji kedai nu aya di The Hallway Kosambi. The Hallway nyaéta hiji creative space nu unik pisan. Unikna naon? Creative Space ieu téh tempatna aya di lantai 2 pasar Kosambi. Jadi diantara kumuhna pasar. Aya hiji lantai di pasar ieu nu memang didamel kanggo narik pemuda nu aya di Bandung.

Gelora Fantasi téh dipigaduh ku Gussaoki. Ieu Gelora Fantasi téh kedai ka tilu nu tos didamel ku Gussaoki. Diantawisna aya Grind Forward nu tempatna aya di Jalan Ambon Bandung, sareng Good Fam’s nu aya di jalan Buah Batu Bandung. Gussaoki ngajelaskeun naon nu jadi béda diantawis tilu kedai kopi nu tos didamel Oki téh.

“Bedana didieu leuwih intimate, nu di buah batu clean, di jalan ambon leuwih ka street” saur Oki nu diwawancara langsung di Gelora Fantasy The Hallway Kosambi (14/7/2020).

Anjeunna gé nyarios yén kopina seueur nyandak ti Jawa Barat sapertos Manglayang, Cililin jsb.

“Kopina seueur nyandak ti Jawa Barat, margi méh tiasa ameng ka pertanian-na,”

Salian ti menu kopi, Gelora Fantasi gé nyadiaan menu nu sanés. Diantawisna nyaéta aya téh, Milk Base sapertos Matcha, Coklat, jsb.

Teras, nu ngadamel unikna. Margi Gelora Fantasi ieu téh tempatna di Pasar Kosambi. Anjeunna bakal ngadamel édisi khusus kanggo Ibu-Ibu nu biasa nawar di pasar. Ogé di Gelora Fantasi, Ibu-Ibu tiasa nawar pami mésér kopi kadieu.

“Didieu bakal aya édisi spésial, Ibu-Ibu bisa nawar, da di pasar nu biasa nawar kan Ibu-Ibu” saur Oki.

Anjeunna gé miharep bakal aya jalmi-jalmi nu di pasar tiasa nyobian kopi nu aya di Gelora Fantasi margi hargana murah pisan diantawis dua kedai nu tos didamel ku Oki. Anjeunna gé ngadamel konsép bar sareng méja ngopi téh aya di hiji tempat, alesanna supados tiasa ngabaur sareng nu sanés.

“Harepanna sih, ngké bakal aya ngopi rakyat (ngora) nu hargana mulai ti 5.000 dugi 10.000 nu tujuanna jalmi di pasar ieu téh tiasa ngarasakeun kopi ti kami, teras hoyong ogé jalmi-jalmi nu order kadieu téh tiasa ningal prosés langsung ngadamel kopi ti kami, margi ieu tempat ngadamel na gé didamel ngabaur supados sadayana tiasa terang proses ngadamel kopi ti kami”