Deui! Kahuruan di Kabupatén Garut, Ayeuna Nimpa Pabrik Kurupuk

Foto: Humas Pemkab Garut

Wasunda, Garut – Dinten Juma’ah kaping 18 Séptémber 2020 mangkukna tabuh 20:30 WIB, Hiji wangunan pabrik kurupuk nu dipigaduh ku Odo (60), di Kampung Gordah RT 03 RW 08 Kalurahan Jayawaras, Kacamatan Tarogong Kidul, Kabupatén Garut ngalaman paristiwa kahuruan.

Aah Anwar salaku Pupuhu Dinas Pemadam Kebakaran (Disdamkar) Kabupatén Garut nyarios, kahuruan wangunan nu ukuranna 10 x 7 méter persegi ieu panyababna masih dina panyalidikan, mung aya dugaan mah kahuruan ieu asalna ti bagéan panggoréngan.

Saurna, kahuruan ieu lumangsung nalika padamel nuju ngalakukeun produksi, jol téh bagéan luhur tungku seuneu nu dianggo manaskeun katél ngadadak ngaluarkeun percikan seuneu. Percikan seuneu éta langsung maruragan dugi ka panggoréngan nu pinuh ku minyak sésa. Kinten na mah aya réaksi ti minyak sésa éta nu jadina seuneu jadi langkung ageung.

Di paristiwa kahuruan ieu, Disdamkar Kab. Garut ngerahkeun opat unit mobil pemadam. Nalika dugi, patugas langsung ngalakukeun lokalisir teras mareuman seuneu. Untungna, seuneu teu ngajalar ka bumi nu pasabeulah. Dibantos ku polsék, koramil sareng masarakat satempat. Sanaos teu aya korban jiwa, mung karugian dina kahuruan ieu dugi ka puluhan juta rupiah.

 Salian di Kalurahan Jayawaras, paristiwa kahuruan gé lumangsung di wilayah Tarogong Kalér, pasna di Jalan Raya Samarang, caket Perumahan Bumi Malayu, Désa Mekarwangi, nyaéta objék nu kaduruk nyaéta lahan gérémbél.

Kiwari, di Kabupatén garut sering pisan aya paristiwa kahuruan. Ku kituna, Aah terus ngingetan ka masarakat pikeun ati-ati nalika nganggo seunu, pami aya nu nuju masak, kedah mastikeun ogé seuneu di dapur bener-bener pareum sateuacan iinditan.

“Nalika usum halodo warga masarakat dihimbau pikeun babarengan dina ngajaga lingkungan ogé teu ngalakukeun pabeuleuman lahan sacara liar, supados teu nimbulkeun dampak nu buruk pikeun lingkungan ku sabab kahuruan leuweung sareng lahan,” tegesna, dikutip ti Humas Pémkab Garut (20/9/2020).

Anjeunna gé miharep ka para patani  pikeun langkung waspada, komo deui lahanna nu caket pamukiman. Anjeunna ngadugikeun pikeun teu diantep.

“Minimal kedah nyandak cai kanggo antisipasi kobaran seuneu pami ngaageungan. Teras ogé kedah diantos. Ieu pikeun ngantisipasi pami kahuruan ngaageungan ngarambat ka pamukiman,” pungkas Aah.

Related Articles

Tinggalkan Balasan

Alamat email Anda tidak akan dipublikasikan. Ruas yang wajib ditandai *