Mensesneg Ngawajibkeun Unggal Instansi Masang Bendera Mérah Putih ti Ayeuna – Wasunda

Foto: infopublik.id

Indonésia sakedap deui nyambut dinten nu paling bersejarah kanggo nagara urang. Leres, Hari Ulang Tahun (HUT) ka-75 kamerdékaan Indonésia tinggal ngantosan waktos, mung dua mingguan deui. Ku kituna, Pratikno salaku menteri Sekretariat Negara (Mensesneg) ngadugikeun ka sadaya instansi pamaréntah pusat sareng daérah kanggo masang ogé ngibarkeun bendéra mérah-putih sacara serentak di lingkunganna séwang-séwang salami sasasih.

Dumasar ti situs infopublik.id, Mensesneg ngaluarkeun Surat Édaran Mensesneg dina nomer B-457/M.Sesneg/Set/TU.00.04/06/2020 nu eusina “Masang sareng ngibarkeun Bendéra Mérah Putih di antawis umbul-umbul ngawitan ti kaping 1 dugi ka 30 Agustus 2020”

Ku kituna, instansi pamaréntah gé kedah ngamanpaatkeun sacara maksimal logo ogé désain HUT ka-75 di unggal kanal komunikasi nu dipigaduh ku instansi kakait. Ku nganggo logo nu diunduh langsung ti laman resmi setneg.go.id supados para warga masarakat Indonésia tetep jadi warga nu nasionalis, sanaos mung ningalikeun stiker atawa sajabana di média, margi jaman ayeuna mah ku arurang paduli liwat média gé nu sanésna tiasa jadi ngiringan.

“Mangpaatkeun sacara maksimal logo sareng desain turunan HUT ka-75 kamerdékaan RI ka lebet unggal média (wébsite/média sosial instansi, stiker kandaraan dinas, kandaraan jemputan, souvenir ogé merchandise di instansi jeung sajabana,” saurna, dikutip sareng disunting kana basa Sunda ti surat édaran di luhur (2/8/2020).

Palaksanaan pamasangan sababaraha kagiatan ieu sakumaha nu kacantum ti surat édaran Menteri Pratikno, nyaéta kedah patuh sareng nurut ka protokol kaséhatan nu berlaku. Supados teu nimbulkeun ogé nyiptaken klaster panularan virus Covid-19 nu anyar.

“Palaksanaan hal-hal nu dimaksud, supados nurut ka protokol kaséhatan pananganan sareng panyergahan Covid-19 sareng sagala pambiayaan kedah dilaksanakeun sasuai sareng katangtosan peraturan sareng perundang-undangan,” pungkasna

Surat Édaran Mensesneg Negara Pratikno dina nomer B-457/M.Sesneg/TU.00.04/06/2020 dikirimkeun ka sababaraha instansi pamaréntah kaping 23 Juni 2020. Surat édaran ieu nyuhunkeun partisipasi sadaya instansi pamaréntah ti unggal tingkatan kanggo nyemarakkeun HUT ka-75 Indonésia. Ku masang sababaraha alat peraga ti ngawitan bendéra dugi ka umbul-umbul nu ngarujuk kana logo sareng desain nu diterbitkeun Sekretarian Negara.