Kuliner Khas Jawa Barat Liwat Album Pu(nk)jasera – Wasunda

Artwork : Breh & The Bangsat/Array

Dua tahun  kapungkur, pasna kaping 27 Oktober 2018. Opat pamuda Jatinangor, Bonyok (Vokal), Breh (Vokal Gitar), Dekur (Bass), Obitr (Drum) ngarilis album 14 lagu nu judulna Pu(nk)jasera. Pu(nk)jasera dicokot tina kata Pujasera nu artina tempat nu isina para pedagang dahareun. Pujasera ieu kecapna rada dimodifikasi sakedik jadi Pu(nk)jasera margi aliran band opat pamuda ieu téh nyaéta Punk.

Punk nyalira nyaéta salah sahiji aliran musik nu tos berkembang di Indonesia ti jaman tahun 1995 kapungkur. Bréh and The Bangsat mawa spirit Punk kanggo ngenalkeun dahareun khas khususna ti Jawa Barat. Salah sahiji spirit jeung idé nu unik di jaman ayeuna yén jalmi tos hilap ka dahareun khas Jawa Barat nu diingetan deui ku Bréh and The Bangsat liwat irama lagu.

Ti total 14 lagu nu eusina ngeunaan spirit dahar nu jadi kabutuhan primer urang. Aya 9 lagu dahareun Jawa Barat nu dikenalkeun ku Bréh and The Bangsat. Diantawisna aya Dodol, Galéndo, Cipuk (Cireng Kurupuk), Loték, Goréngan, Burayot, Tahu Bulat, Empal Gentong, jeung Bandros.

Bréh and The Bangsat ngarilis album Pu(nk)jasera ieu téh unik, nyaéta liwat kasét pita nu sabenerna di jaman ayeuna tos jarang jalmi ngandangu lagu nganggo kasét pita teras didangukeunka tape. Ngan butuh waktos saminggu leuwih, 100 kasét nu diliris séép kaical. Tapi tenang, aranjeun masih bisa ngadangu album Pu(nk)jasera ieu di platform musik Bandcamp.com atanapi langsung cek Youtube-na Bréh and The Bangsat, dijamin wareg!