Kantos Lalajo Channel Budak Kocéak di Youtube? Ieu Sajarahna! – Wasunda

Foto: Instagram Budak Kocéak

Kantos lalaju Budak Kocéak di Youtube? Budak Kocéak nyaéta salah sahiji channel Youtube nu eusina ngeunaan kabiasaan Barudak nu aya di Désa Kocéak. Kocéak nyaéta salah sahiji désa nu unik. Naha beut unik? Margi désa ieu téh ayana di gigireun Bumi Serpong Damai (BSD) city pisan. Jadi diantawis daérah méwah nu aya di Tangerang ieu téh aya hiji désa nu nyempil. Nyaéta Desa Kocéak.

Nu unik deui na téh nyaéta bahasa Sunda urang Kocéak nu kacampur sareng bahasa Betawi. Jadi aya serapan ti budaya Betawina. Arurang bakal disayogikeun bahasa nu bener-bener jauh ti bahasa Sunda nu biasa ku urang paké di daérah Bandung jeung sajabana.

Nalika ditalipun liwat whatsapp. Sutradara sakaligus juru kaméra Budak Kocéak, Abdul Rohman ngaku anjeunna mémang hoyong jadi youtuber. Malah sateuacan aya channel ieu téh anjeunna kabingungan ngadamel email, sareng cara ngaposting video di di Youtube. Nu akhirna aya réréncanganna nyaéta nu janten Ustadz Bacecet di channel Budak Kocéak.

“Saya téh émang hoyong ngadamel Youtube, mung ngadamel email waé gé teu tiasa. Akhirna aya nu jadi Ustadz Bacecet di Budak Kocéak anjeunna tiasa ngadamel email,” saur Abdul liwat talipun whatsapp (11/7/2020).

Channel nu subscriber-na 871.000 ieu téh tos ngadamel leuwih ti 100 episode. Anjeunna gé nyarios Budak Kocéak ieu téh viral gara-gara aya di episode 2, salah sahiji pamaén utama Budak Kocéak nyaéta Irfan, anjeunna gaduh seuri nu unik nu nepi ayeuna dipaké terus di tiap episode Budak Kocéak.

“Nya pas mimiti upload mah Budak Kocéak téh can arapal, pas episode dua, si Irfan boga seuri nu unik nu akhirna dipake unggal épisode Budak Kocéak. Video ieu téh seueur dicandak ku akun-akun komedi nu aya di sosmed,” saur Abdul.

Abdul gé miharep barudak nu aya di Kocéak ieu téh tiasa teras jadi jalmi nu mangpaat kanggo jalmi sakitar. Ayeuna tiap pamaén nu aya di Budak Kocéak diantawisna Irfan, Calo, Ustad Bacecet, jsb tos gaduh channel sareng anak buahna masing-masing.

“Saya sih miharep kanggé pamaén khususna barudak nu aya di Kocéak ieu téh bisa mangpaat kanggo jalmi sakitarna,” teges Abdul.