Gara-Gara Taledor, Mobil Tikusruk Ka Walungan Kalimalang – Wasunda

Sumber foto: news.detik.com

Wargi Bekasi geunjelung sabab jam tilu janari tadi aya mobil nyungseb ka walungan Kalimalang, Jatibening, Bekasi Barat. Gara-gara ka talédoran supir kajadian ieu ngakibatkeun hiji indung maot di tempat, jeung hiji deui budak umur 3 taun palid nepi kiwari can kapanggih ku tim SAR.

Kronologi kajadiannana, Sutaryo (supir) angkat ti Purwokerto mawa niat dék néang Samsiah (korban) maké mobil innova warna hideung, plat no B-1110-BZH. Waktu dék balik deui ka Purwokerto, dina mobil aya Sutaryo, samsiah, ditambah wé dua budakna Samsiah. Jadi dina jero mobil aya opat jalmi.

Singhoréng kajadian ieu téh lantaran supir anu nundutan waktu ngajalankeun mobil. Ahirna pas mobil ngaliwat jalan hareupeun masjid Ibnu Sina, Jatibening, Pondok Gedé, Kota Bekasi. Anu kuduna méngkol nuturkeun jalan ieu mobil kalah lempeng asup kana walungan.

“Samsiah pas kapangih geus ngantunkeun, ahirna dicandak ka RSUD Kota Bekasi. Tapi hanjakal puterina Samsiah, Nabila Farahma Mida (3) dugi ayeuna teu acan kapendak sabab kabawa palid.” Kitu saur Kasat Lantas Polres Metro Bekasi Kota AKBP Ojo Ruslani, Dugi kiwari usaha milari NFM masih dilakukeun, kitu ogé mobil sareng supir geus dievakuasi ku pihak damkar sareng kapolisian satempat, Jumat (10/7/2020).

Editor : Muhamad Hasanudin