Fasilitas Internét Haratis Di RW 09 Perum Bumi Malayu Garut – Wasunda

Foto: Humas Pémkab Garut

Fénoména diajar liwat jaringan informasi ngadamel inovasi kanggo kalangan pendidikan, ku kituna kanggo warga nu gaduh tanggung waler kanggo kalangsungan pendidikan murangkalihna.

Dumasar Humas Pémkab Garut, nembé-nembé ieu hiji inisiatif dilakukeun pangurus RW 09 Désa Sirnajaya, Kecamatan Tarogong Kalér, pasna di Perumahan Bumi Malayu, nyadiakeun fasilitas internét sacara haratis. Sanaos kabatas ti sisi jangkauan, mung saheunteuna tiasa ngurangan beban para sepuh dina nyumponan hak murangkalih kanggo ngaraosan pendidikan.

“Kami nembé ngawitan sasasih kamari, salaku wujud tanggung jawab kami, sanaos kami sadar kapasitas internétna masih terbatas pisan,” saur Yusép Trésna salaku Pupuhu RW 09, dikutip sareng disunting kana basa Sunda ti Humas Pémkab Garut (12/8/2020).

Saur Yusép, panyadiaan fasilitas internét ieu disababkeun ku kaprihatinana dina kasulitan para sepuh nyadiakeun fasilitas internét margi nyangkut kana kamampuan ékonomi, kaleuwih di mangsa pandemi Covid-19 ieu.

“Kami ngupayakeun nyisihkeun anggaran saayana, khususna murangkalih,” saurna.

Hasilna, ampir unggal dinten kantor sekretariat RW ramé ku aktifitas murangkalih. Aya nu saukur ngamangpaatkeun wifi, atawa budak ngora maén voli atawa ténes méja.

“Alhamdulillah unggal sonten barudak ngaramékeun kantor ieu, kami mah mung merharoskeun hungkul,” saur Yusép nu némbe dipercanten janten Pupuhu RW 09 sababaraha sasih ieu.

Wakil Bupati Garut dr. Hélmi Budiman ngungkapkeun aprésiasi sareng ngahaturkeun nuhun ka RW 09 nu gaduh inisiatif masihan fasilitas ka wargana liwat fasilitas internét publik.

“Pami aya perumahan masihan fasilitas éta, nya abdi ngahaturkeun nuhun. Mugia tiasa janten conto perumahan nu sanés,” saur wakil bupati.

Saur Hélmi, kabutuhan internét dibutuhkeun ku masarakat, utamina nalika ayeuna pendidikan ngamangpaatkeun daring (dalam jaringan), komo deui keluhan ibu-ibu ngeunaan ngagaleuh pulsa.

Ayeuna, liwat komano anjeunna nuju giat-giatna ngalereskeun jalan-jalan alit nu sumberna ti bantosan désa sareng swadaya masarakat satempat.

“Kami ogé ngadamel pos-pos ronda sareng ngaktifkeun ronda deui, salaku wujud nyiptakeun rasa aman warga,” saur Yusép.

Salaku bentuk akuntabilitas, unggal sasih pangurus ngapublikasikeun réalisasi anggaran supados warga terang diangg naon waé anggaranna, utamina nu asalna ti sumbangan wargana.