Daging Sapi, Jeroan Sapi, Empal Gentong! – Wasunda

Foto: Instagram/ Noviabdul_

Cirebon mangrupakeun kota nu kasohor ku udangna. Nu jadina seueur kulinér nu aya didieu téh aya hubunganana sareng udang, éta sababna Kota Cirebon ieu téh dilandian Kota Udang. Tapi, salian ti udang. Cirebon nyimpen hiji kuliner khas nu teu éléh nikmatna ti udang.

Saha sih urang sunda nu teu terang empal gentong? Salah sahiji dahareun nu asalna ti daging sareng jeroan sapi, nu dipasihan kuah santen konéng ieu téh rasana nikmat dunya malah tiasa dugi akhérat frén! Kulinér khas Cirebon ieu gé kasohor dugi ka mancanegara! Ngeri pisan!

Dumasar ti sababaraha pamandu di kawasan wisata Cirebon, empal gentong saleresna sanés murni ti kota ieu asalna. Empal gentong ieu téh mangrupakeun dahareun ti Timur Tengah nu dibawa ku para pedagang ka Kota Cirebon. Dahareun ieu salajengna diadaptasi ku cita rasa khas Cirebon supados cocok di létah para petinggi harita.

Lamun anjeun ka Cirebon, ieu mah jiga wajib hukumna anjeun kedah nyobian empal gentong! Di mana mendakanna? Tah ieu, pami anjeun hoyong empal gentong. Ampir di unggal sisi jalan Kota Cirebon, aya ieu dahareun téh. Tapi, aya hiji tempat empal gentong nu kasohor di Cirebon nyaéta empal gentong H. Apud nu aya di Jalan Raya Djuanda No.24, Battenbat, Tengah Tani, Cirebon.

Margi kapungkur mah teu acan dikenal nu namina gas. Orang-orang Cirebon ngadamel empal gentong ieu téh nganggo hawu ogé nganggo gentong nu didamel tina taneuh liat. Éta justru nu ngadamel rasa si empal gentong ieu téh nikmat tiada tara. Dugi ka ayeuna. Empal gentong nu raos téh nyaéta empal gentong nu dipasak kénéh kanu gentong. Hayu ah cuang ka Cirebon! Wang emam empal gentong!