Carita Horor di Kampus Padjadjaran #1 – Wasunda

Kuring salah sahiji mahasiswa kampus nu kasohor di Jatinangor. Nya, kuring kuliah di jurusan Sastra Sunda. Ti saacan kuring kuliah, Jatinangor komo kampusna lumayan kasohor ku hal-hal mistis-na. Salah sahijina carita mistis nu aya di Fakultas kuring. Fakultas Ilmu Budaya.

Di Fakultas ieu, aya hiji tempat nu dianggap mistis. Leres, Pusat Studi Bahasa Jepang atau disingkat PSBJ. Ieu bangunan téh nyaéta salah sahiji bangunan mimiti kampus Jatinangor. Bangunan-na khas pisan ku struktur kajepangan. Boh éta tembokna, pantona, jeung sagala rupa bangunan-na, Jepang pisan.

Ieu PSBJ téh geus kasohor ku hal mistisna. Komo aula-na mah, nu sok dipaké acara seminar, péntas seni téater, ospék Fakultas, atanapi kelas bersama ieu téh nyimpen seueur carita. Aya nu nempo pocong mah, aya nu kasurupan pas ospék mah, aya ogé nu ningali panampil “lain” di hiji péntas téater. Pokonamah tempat ieu téh mistis pisan.

Hiji mangsa, simkuring jadi panitia acara ospék Fakultas. Kuring inget ieu dinten jumat nyaéta dinten pamungkas acara ospék ieu. Isina aya panitia nu bagian jadi bobonékaan kardus nu dinamikeun kandaya. Éta kandaya di dinten terakhir téh jadi jujurigan. Nyingsieunan mahasiswa anyar ti gerbang nepi ka Fakultas, da acarana dikawitan ti subuh kénéh, jadi suasana-na keueung kéneh.

Ogé ieu acara terakhir pastina hiburan. Nyaéta aya Olegun Gobs, salah sahiji grup music ska nu kasohor di kampus ieu. Jam 3 subuh, kuring ditelepon ketua divisi kanggé ngecek drum di gudang aula PSBJ. Kaleresan harita kuring keur mondok di kampus. Ah kruing téh wani teu wani da dititah ku ketua divisi, komo senior téa kan.

Leumpang wéh kuring téh ti sékré Sastra Sunda ka PSBJ, luamayan lah jarakna aya kana 100 meter waé mah. Éta mah salila leumpang haté téh teu genah wéh, tapi da kumaha deui. Nepina di Aula, kuring langsung asup ka Aula, si gudangna téh teu jauh ti panto asup Aula, sisieun panggung pisan.

Pas asup, kuring teu ngarasakeun aura nu anéh-anéh untungna téh. Kuring ngecék drum nyahona aya, aman wéh Olegun Gobs téh ngké manggung. Eh, karék gé kaluar ti gudang. Éta kipas angina nu jumlahna aya 8 di unggal sisi Aula, nu asalna parareum, jol harurung sorangan. Atuh kuring langsung lumpat da kasieunan. Éta mah ti harita kénéh, kuring mbung deui ka Aula PSBJ tipeuting mun sorangan.

Iman Setiawan