Cah Oyong Soun Jeung Sop Oyong Campur Tahu – Wasunda

Sop Oyong Campur Tahu. /cookpad

Teu karaos nya Baraya, Iedul Adha bakal sumping sakedap deui. Di unggal bumi pasti bakal karaos lendeng seungitna daging domba sareng daging sapi. Tah, cara sangkan malidkeun kalendeng éta, saéna Baraya masak anu tiis-tiis ambéh henteu panas teuing patuangan.

Salah sahiji bahan anu tiasa dipasak nyaéta oyong. Sok aya ogé anu nyebat gambas, bulustru atanapi emes, padahal éta-éta kénéh. Nu tiis kana patuangan sapertos bonténg. Mangga geura cobian. Ieu resép kintunan ti Ibu Winarsih. Mugia katampi.

CAH OYONG SOUN
Bahan-bahan :

¼ kg oyong, keureut sérong 3 séntian.

150 gr. daging hayam, potong pasagi 2 séntian.

25 gr. soun, keueuman ku cai tiis, tos layu dikeureutan.

Bungbu-bungbu :

Sagendul bawang bongbay siksik ipis, 2 sihung bawang bodas dicincang, saséndok ntéh pedes bubuk, ½ sendok ntéh lisah wijén, uyah sareng gula sacekapna, 2 tangkal bawang daun keureut sérong 2 séntian, bawang goréng kanggo puruluk, bungbu masak, salambar daun salam sareng cai panas 3 gelas, 3 séndok lisah kalapa.

Ngadamelna :
  • Panaskeun lisah, tumis bawang bombay, bawang bodas, salam dugi ka leumpeuh. Lebetkeun daging hayam dugi ka peungkeur tur robah warnana.
  • Lebetkeun cai panas, bungbuan ku pedes, lisah wijén, uyah, gula, bungbu masak, kocékeun. Raosan.
  • Sabada ngagolak lebetkeun oyongna, kocékeun dugi ka oyongna hipu. Pamungkas lebetkeun bawang daun sareng soun, kocékeun dugi ka leumpeuh (layu).
  • Nyayagikeunana dipurulukan bawang goréng. Raos dituang haneut-haneut. Cekap opataneun.
SOP OYONG CAMPUR TAHU
Bahan-bahan :

Saons oyong nu tos kenging mesékan, dikeureutan buleud.

Saons tahu, diseupan sakedap supados peungkeur, teras dikeureutan aralit.

10 gr. daging cingcang, saséndok makan minyak kanggo numis.

Bungbu-bungbu :

2 sihung bawang beureum, sasihung bawang bodas, pala sakedik, uyah sareng pedes sacekapna.

Ngadamelna :
  • Bungbu-bungbu diréndos sing lembut. Tumis dugi ka seungit. Lebetkeun daging cingcang sareng oyong.
  • Lebetkeun cai sagelas, sina dugi ka ngagolak. Upami resep tiasa ditambihan bumbu penyedap.
  • Pamungkas, lebetkeun tahuna. Sabada karaos bungbuna, jait.
  • Nyayogikeunana haneut-haneut. Cekap kanggo duaaneun.

Cah Oyong Soun. /selerasa

Penulis : Agung Apryan