Bioskop Buka Deui Ping 29 Juli 2020 – Wasunda

Sumber : Grid Fame-Grid.ID (9/7/2020, 14.16 WIB)

Saprak aya pandemi covid- 19 sadaya sektor hiburan kalebet bioskop ditutup ku pamarentah pusat dugi pamarentah daerah. Hal ieu diterapkeun minangka usaha nyegah sumebarna virus covid-19 atawa nu biasa disebut virus corona. Saatos pamarentah pusat ngabewarekeun new normal atawa adaptasi kabiasaan anyar, pamarentah Kota Bandung bakal ngamimitian deui muka tempat wisata jeung tempat hiburan salah sawiosna bioskop ti ngawitan ping 29 Juli 2020, kalawan angger dina ngalaksaneukanana kedah nerapkeun protokol kasehatan, sapertos nganggo masker upami kaluar ti bumi, rajin wawasuh panangan ngangge sabun, sareng tetep kedah jagi jarak sareng nu sanes.

Dumasar tina Kompas.com, Salasa (7/7/2020), Pupuhu Gabungan Pengelola Bioskop Seluruh Indonesia (GPBSI), nu oge ngawakilan XXI, CGV, Cinepolis, Dakota, Cinema, Platinum, sareng New Star, Djonny Syarifuddin nguningakeun yèn peryogi waktos dugi ka tilu minggon sangkan protokol kasehatan tiasa dilarapkeun di sadaya bioskop di Indonesia.

Salian ti èta  Dewi Kaniasri, Pupuhu Dinas Kabudayaan jeung Pariwisata (Disbupdar) Kota Bandung wanci on air di Radio PRFM 107.5 News Channel, nguningakeun yèn  tempat hiburan sapertos bioskop, di buka na tetep bakal bertahap, bakal aya peninjauan heula saatos aya serat permohonan tinu ngalola na, saterusna bakal diayakeun simulasi jeung sajabana. Anjeuna nambihkeun yèn di Kota Bandung tos aya sababaraha Bioskop anu tos siap buka sareng aya oge sababaraha nu teacan siap. Dewi negeuskeun upami tempat hiburan atos dibuka protokol kasehatan tos sakedahna dilarapkeun ku masyarakat sareng nu ngalola tempatna, Kemis (9/7/2020).

Editor : Muhamad Hasanudin