Beware of Cosma Milik Ash-Shur, Dimana Kasieun jeung Kabungah Ngahiji – Wasunda

Artwork Beware Of Cosma/Ash-Shur/Andhiko

Wasunda, Trénd – Pandemi sabenerna lain panghalang jang nu ngora pikeun nyarieun karya, salah sahijina musik. Teu saeutik sababaraha musisi lokal nu tungtungna ngawanikeun rilis lagu atawa album di mangsa pandemi ieu. Nya meureun aya nu teu sabar hayang rilis, atawa nu saukur “Ah daripada euweuh gawé pas pandemi”.

Ash Shur, band asal Kota Kembang nu ngusung genre gypsy rock ieu, ngawanikeun maranéhna pikeun ngarilis album debutna dina tajuk Beware of Cosma di panungtung taun 2020 nu pinuh ku ririwit ieu. album nu eusina aya 8 track/lagu ieu kungsi dirilis di Digital Streaming Platform di kaping 27 Désémber 2020.

Beware of Cosma, hiji répréséntasi fase hirup nu diruangkeun kajero hiji laras nu nyayat haté. Fase dimana hadé jeung goréng, katuhu jeung kakénca katingalina sarua waé. Beware of Cosma jadi pananda pikeun waspada ka naon waé nu aya di alam dunya, salah sahijina waspada ka diri sorangan. Beware of Cosma nyaéta ambang batas dimana kasieun jeung kabungah aya di hiji titik nu abu-abu.

Matéri album nu sabenerna bérés digawékeun di panungtung 2017 ieu, karék rampung di taun 2020 ku sabab kasibukan séwang-séwang personél.

“Sabenerna geus lila hayang rilis, terus jigana cocok jadi hadiah jang taun 2020 ieu terus ngalengkepan kacauna nu aya sapanjang taun ieu. kiwari sababaraha matéri jang album nu sanggeusna keur digarap, jadi jang taun 2021 urang targét bakal ngaluarkeun album kadua,” ceuk As-Shur, dina prés rilisna.

Ash-Shur dibantuan ogé ku Wangi Gitaswara di bagéan vokal di sababaraha lagu, ogé dibantuan ku Részki Délian di perkus. Vibes kasieun jeung kabungan nu diwujudkeun dina kolaborasi musik, visual jeung gambar diangkat jadi konsép album Beware of Cosma.

Kadalapan lagu Beware of Cosma ieu diantarana aya “Black Journey”, “Great Depression”, “I See the Tree”, “Blacksun and Rainbow”, “Storm Coming”, “Temple of Zumbi”, “Howlin’ More” jeung “Wondering”.

Album ieu gé dirilis dina format CD jeung kasét, dijual sacara bundling ogé kapisah. “Teu aya kawajiban jang ngadangukeun sih, nu penting meuli merch Ash-Shur wéh haha,” tutup Ash-Shur.