Basisir Rancabuaya Garut, Tujuan Utama Wisata – Wasunda

Sumber foto: helloindonesia.id

Basisir Rancabuaya mangrupakeun salahsahiji basisir anu tempatna aya di Kabupatén Garut palih kidul. Kiwari Basisir Rancabuaya tos kasohor janten salahsahiji tujuan utama wisata di Kabupatén Garut. Jarak ieu basisir ti pusat Kota Garut kirang langkung kana 135 KM atanapi kana 3 atanapi 4 jam saupami kana kendaraan mah. Lokasi na aya di Desa Purbayani, Kacamatan Caringin-Garut

Basisir Rancabuaya ieu dikuriling ku tilu désa, nyaéta ti arah utara ku désa Caringin, ti arah timur jeung desa Sinarjaya, ti arah selatan jeung désa Indralayang, ti arah barat jeung samudera Hindia. Aya sababraha rute kanggé dugi ka Basisir Rancabuaya ieu. Ti arah Garut aya dua jalur, nyaéta Garut-Cikajang-Pameungpeuk-Rancabuaya atanapi Garut-Cikajang-Bungbulang-Rancabuaya. Rute arah Pangaléngan nyaéta Pangaléngan-Cisewu-Rancabuaya. Rute arah Cianjur, nyaéta Cianjur-Cidaun-Rancabuaya.

Rute jalan anu sok dianggé ku wisatawan anu ti arah bandung nyaéta rute pangalengan-Cisewu-Rancabuaya, salianti jarakna anu deukeut ogé jalanna anu mulus. Kumargi jalur éta mah jalur provinsi. Anu ti arah Garut atanapi ci anjur bakal nyorang jalan anu merenah ogé kumargi ayeuna Pemda Garut keur bener-bener ngawangun pariwisata Kab. Garut.

Dina tilu jalur ieu, dulur sadayana bakal disuguhkeun panorama héjo anu matak betah tur jauh kana perkara stress. Tapina tetep kedah ati-ati, kumargi aya sebaaraha jalan anu pungkal-pengkol.

Kanggé akomodasi, dulur tiasa ngamanfaatkeun vila atanapi panginapan anu aya di wilayah Basisir Rancabuaya ieu. Lahan parkir sareng gazébo atos disayogikeun kanggé kanaraan sareng tempat kanggé ngobrol di sisi basisir jeung kulawarga atanapi réréncangan.

Moal sampurna lamun ka Basisir Rancabuaya tapi teu kungsi beubeuleuman lauk. Dicaketeun villa aya jasa tukang meuleum lauk anu hargana ogé mirah jeung kajangkou ku masarakat menengah ka handap. Jadi dulur-dulur teu kedah riweuh atawa ripuh ngageber ku hihid sabari meuleum lauk. 

Waktu pasosoré warna méga rubah jadi warna kayas ting baranang tibelah kulon, waktu anu pas jang nénjo ka arah laut jeung pasangan. Basisir Rancabuaya katelah ku sunsétna anu matak pikabiteun jeung pikasonoeun jang datang deui kedieu. Jadi hayu ka Basisir Rancabuaya, Garut lur.

Editor : Muhamad Hasanudin