Awas! Teu Nganggé Masker Bakal Didenda – Wasunda

Sumber: antarafoto.com

Kudu ati-ati warga Jabar, kantenan anu aya di wilayah dayeuh mah. Margina ti mimiti mingon payun pamaréntah bakal ngadenda sing saha baé anu teu nganggo masker waktu kaluar ti imah atawa keur ditempat umum. Dendana ogé teu kajeun gedé na nyaéta Rp. 100.000. 

Istrina gubernur Jawa Barat, Ibu Atalia Praratya ogé sempet nguatkeun jeung ngadukung kana kabijakan anu dijieun ku pak gubernur Jawa Barat. Lain pédah ku urusan duit, tapi ieu mah jang kahadéan warga Jawa Barat. Kitu kecap Atalia dina waktu anjeuna nyiarkeun langsung dina instagramna.

Sadaya pamaréntah ti mimiti RT nepi ka presiden pasti nyaah ka rahayatna, kabijakan wajib maké masker dina waktos kiwari kacida pisan pentingna. Sabab covid-19 bakal babari pisan tépa kanu lianna lamun urang sadaya henteu merhatoskeun protokol atawa aturan kaséhatan ieu.

Masih saur Ibu Atalia, nganggo masker teh kalintang penting pisan. Saliantin bisa ngajaga  diri tina nyebarna ieu covid-19, tapina ogé jang ngajaga kaséhatan diri boh tina virus, bakteri, kebul jeung sabangsaning sumber panyakit anu teu kapelong ku soca.

Sateuacanna, Kang Émil ngadamel kabijakan sapertos kitu téh dumasar  kana hasil panilitian anu ngabuktoskeun yén masker téh bener-bener efektif pisan kana nyegah nyebarna covid-19. Matak dina bantuan sosial gubernur, atos disiapkeun masker kanggo warga anu kéngéng bantuan.

Saleresna atos ngagunakeun sababaraha cara kanggo ngémutan sangkan warga daék maké masker. Geus ku toa atawa sapiker, ngadatangan tempat-tempat ramé jeung anu séjénna. Usaha éta dilakonan sangkan wabah covid-19 téh bisa turun tuluy leungit khususna ti bumi Jawa Barat. Sangkan kahirupan bisa balik deui ka waktu anu normal.

Ngalawan covid-19 ieu teu tiasa ku séwang-séwangan tapi kudu babarengan, réréongan, sabilulungan. Sabab geus jadi kawajiban urang sadaya jang ngajaga kaséhatan tatar sunda, mingu (12/7/2020).

Editor : Muhamad Hasanudin