Arsénal si Koléktor Piala Kaléng, Tapi Kadé, Ieu Rékor! – Wasunda

Foto: instagram @arsenal

Kaping 1 Agustus 2020 kamari jadi momen spésial jang Arsénal si London Beureum. Naha momen spésial? Ku sabab sanaos piala kaléng gé, angger. Ieu jadi rékor kanggo Arsenal jadi nu panglobana meunangkeun ieu Piala FA téh. 14 piala diraih ku Arsénal, unggul 2 piala ti tim jurig beureum, Manchester United nu ngempelkeun 12 piala FA Cup.

Padahal di pertandingan éta, Chelsea sempet unggul liwat golna Pulisic. Tapi kasalahan Chelsea nu matak meunang pinalti jang Arsenal teu disia-siakeun ku Aubameyang, gol jadi hiji sama. Menit ka 67 Arsénal malah jadi unggul liwat gol éndah nu deui-deui ti Aubameyang.

Cag! Piala kaléng nu ka opat belas ieu jadi rékor yén Arsénal jadi hiji-hijina tim inggris nu ngaraih piala FA panglobana. Sanajan aya sababaraha insidén nu kontrovérsial. Diantawisna Kovacic nu dipasih hadiah kartu beureum ku wasit Anthony Taylor, ogé momen Martinez néwak bola di luar kotak pinalti.

Ieu catetan Arsenal juara FA ti taun ka taun:

  1. Taun 1929-30 – Arsénal ngamimitian juara lawan Huddersfield Town ku skor 2-0
  2. Taun 1935-36 – Meunang lawan Sheffield United dina skor 1-0
  3. Taun 1949-50 – Meunang lawan Liverpool dina skor 2-0
  4. Taun 1970-71 – Meunang lawan Liverpool dina skor 2-1
  5. Taun 1978-79 – Meunang lawan Manchester United dina skor 3-2
  6. Taun 1992-93 – Meunang lawan Shefield Wednesday dina skor 2-1
  7. Taun 1997-98 – Meunang lawan Newcastle United dina skor 2-0
  8. Taun 2001-02 – Meunang lawan Chelsea dina skor 2-0
  9. Taun 2002-03 – Meunang lawan Southampton dina skor 1-0
  10. Taun 2004-05 – Meunang lawan Manchester United dina skor 5-4 (gulgulan/adu pinalti)
  11. Taun 2013-14 – Meunang lawan Hull City dina skor 3-2
  12. Taun 2014-15 – Meunang lawan Aston Villa dina skor 4-0
  13. Taun 2016-17 – Meunang lawan Chelsea dina skor 2-1
  14. Taun 2019-20 – Meunang lawan Chelsea dina skor 2-1

Sanajan Arsénal Koléktor Piala Kaléng nu sok dilandian ku para pandit ogé penggemar sépak bola, tapi angger, Arsénal gaduh rékor. Daripada teu gaduh rékor, kan?