Anyun Cadél Rancaékék Pride – Wasunda

Foto: instagram @anyuncadel

Stand Up Comedy nyaéta salah sahiji jalur jalmi kanggo ngaraih kasuksésan. Teu sakedik para pamilon Stand Up Comedy Indonésia (SUCI) Kompas TV sareng Stand Up Comedy Academi (SUCA) Indosiar ngalahirkeun jalma nu suksés. Di antawisna aya Érnest Prakasa, kaluar janten jawara 3 di SUCI Season 1, anjeunna suksés janten sutradara terkenal, malahan mah film nu judulna Ngenest sareng Cék Toko Sebelah bisa ngaraih jutaan panongton di bioskop. Ogé aya Uus, saha nu nyangka, Uus nu kaluar mimiti di SUCI Season 3 ayeuna bisa jadi MC kondang, maén film kaditu kadieu jadi jalma nu terkenal.

Ku kituna, tim WaSunda ogé bakal ngupas kahirupan salah sahiji komika asal Rancaékék, Anyun Cadél. Ariz Prataph atawa Anyun Cadél ieu salah sahiji pamilon SUCA Season 2 nu kaluar janten 6 besar. Ti SUCA 2 anjeunna berhasil shooting sinétron kaditu kadieu, salah sahijina sinétron Tukang Ojég Péngkolan di RCTI. Teu saukur sinétron, Anyun gé sababaraha kali jadi pemeran di sababaraha film bioskop, salah sahijina Cék Toko Sebelah, nu berperan jadi anak buah Budi Dalton

Carita Anyun lain saukur carita ayeuna jadi pamaén sinétron. Tapi carita pasualan perjuangan Anyun nepi ka tahap ieu. Aya paribasa nyarios “euweuh untung ku énténg” téh diraosan pisan ku pamuda asal Rancaékék ieu. Butuh waktos nu cekap lami nu tiasa ngajadikeun Anyun dinten ieu.

Dumasar pangalaman pribadi panulis, Anyun lain jalma nu pamalesan, anjeunna jalmi nu rajin sareng kerja keras. Mimpina jadi saurang entertainer lain saukur ucap. Bébélaan ngadatangan komunitas Stand Up Comedy di unggal kota kanggo ngalatih kamampuan Anyun. Malahan mah inget harita bébélaan ti Rancaékék ka Cimahi nganggo karéta api di taun 2014, ku giatna Anyun ieu migaduh cita-cita. Leres, usaha moal menghianati hasil. Cadélna Anyun nu teu tiasa ngomong hurup R sareng gimmick anjeunna nu jadi orang lembur ti Rancaékék, ngabawa anjeunna jadi Anyun nu dikenal ku masarakat.

Di mangsa pandemi ieu, sami sareng kasusahan jalmi nu sanésna, sesah milari artos, pagawéan, jeung sajabana. Anyun ngalaman hal nu sami, shooting areureun sadayana, panggilan job stand up comedy can aya, da stand up euweuh panongton mah sepi. Nu akhirna Anyun muter otak teras kaidéan ngadamel channel YouTube “Anyun Cadél”.

Akun YouTube nu nembé upload vidio dinten Sabtu, kaping 1 Agustus 2020 ieu anjeunna ngadamel kontén nu judulna “Ngarudag”, Ngarudag nyaéta singkatan ti “Ngaripiuw Tukang Dagang” nu pastina ieu eusi vidiona ngeunaan tukang dagang nu aya di sakitar lingkungan Anyun.

Anyun ngaku, anjeunna ti kapungkur hoyong pisan ngadamel channel YouTube, mung gara-gara jadwal shooting-na nu padet, nu akhirna Anyun tiasa ngadamel channel ieu nalika nuju pandemi Covid-19.

“Margi corona jadi teu aya panggilan shooting, Stand Up ogé masih teu meunang da kudu raraméan, jadi ayeuna meumpeung aya waktu ogé kapikiran konténna,” saur Anyun nalika diwawancara via WhatsApp ku tim WaSunda (3/8/2020).

Anjeunna gé ngajelaskeun naha kapikiran kanggo ngawawancara tukang dagang nu sabenerna jarang di-éxpose ku média, saha nu apal. Anyun Cadél nu mémang down to earth bisa ngawawancara kumaha kahirupan tukang galon jeung susah payahna jadi tukang galon.

“Kapikiran Ngarudag tukang galon soalna si éta kan rintanganna berat, mawa beban. Terus hayang apal kumaha si tukang galon di jalanna, naha pernah aya kasusah pas mawa galon,” saurna

Salian ti kontén ngarudag, anjeunna bakal ngadamel ogé sababaraha kontén diantawisna bakal ngawawancara para Seniman atawa artis khususna di tatar Sunda.

“Ai nu Ngarudah mah geus pasti ngareview tukang dagang, tapi ngké bakal aya kontén ogé bareng Seniman atawa Artis khususna nu ti tatar Sunda,” saur Anyun.

Di kontén Ngarudag ieu anjeunna gaduh misi kanggo terus nga-éxpose tukang dagang khususna nu tara ka-éxpose di média, ogé ngadugikeun pesen ka masarakat yén ulah tong sok ngarendahkeun sagala nu aya di dunya. Margi sadaya gé sami teu dibéda-bédakeun. Anjeunna gé miharep unggal vidio nu ku anjeunna di-upload terus tiasa ngahibir masarakat umum.

“Harepanna sih bisa ngahibur, ogé ulah ngarendahkeun kaum para tukang dagang. Teras hayang nga-éxpose soalna jarang ka-éxpose kan,” pungkasna