Akhirna, Kasus Ieu Manggih Titik Ca’ang – Wasunda

Sumber ilustrasi: trubunnews.com

Atos langkung ti samingon, kasus rajapati éditor Métro TV Yodi Prabowo henteu ngahasilkeun informasi nu pasti. Pihak kapulisian ngaku atos mendak sidik jari jalmi anu tiasa jenten pituduh kanggé ngaréngsékeun kasus ieu. Dumasar kana éta, pulisi tiasa néwak si palaku rajapati Yodi Prabowo. Sidik jari ieu aya dina péso anu sapertosna di anggé ku palaku jang nikam korban. Untung anying K9 ngangseu kana sanjata ieu, ahirna péso éta tiasa janten jalan kaluarna kasus ieu.

Kabid Humas Polda Métro Jaya, Kombes pol Yusri Yunus ngabéwarakeun yén pihakna atos mendakan kamajuan perkawis kasus rajapati anu ngeuna ka éditor Métro TV, Yodi Prabowo. Dilansir tina tayangan cénel youtube Kompas TV, Yusri Yunus ngajelaskeun sidik jari anu aya dina péso kamungkinan sidik jarina palaku, sabab péso éta kapanggih dilokasi korban tiwas.

Sajauh ieu, kanggé meunangkeun informasi anu leres dina kasus ieu tim panyalidik atos mariksa 29 jalmi saksi. Perkara ieu lain perkara énténg, salain kudu ati-ati pulisi ogé kudu taliti sabab bisa waé kasus ieu lain kasus hiji-hijina.

Bukti-bukti ogé parantos dikumpulkeun kanggé panguat, sapertos barang-barang anu aya di TKP dugi ka video tayangan atanapi rekaman CCTV anu aya di lingkungan TKP. Salahsahijina péso éta, anu bisa jadi alat kanggé niwaskeun korban.

Polda Métro Jaya nyaurkeun yén péso atanapi barang bukti ieu tos dipasihkeun ka pihak Laboratorium Forensik Polri kanggé dipariksa ngeunaan sidik jari anu aya dina péso.

Sanajan kitu, pihak Polda Métro Jaya masih naliti kanggémanggih katerangan anu leres.

“kami masih ngantosan hasil ti Labfor. Mudah-mudahan aya hasil saénggalna dina perkara ieu. Insyaallah aya jalan kaluar, tapi masih ditaliti. Saupamina hasil labfor atos kaluar tangtos kami tiasa ngabéwarakeun deui sidik jari saha anu aya dina éta péso.”

Pihak Polda Métro Jaya ogé nepikeun, yén dina ngungkapkeun ieu kasus téh mendakan kendala. Pak Yusri Yunus nepikeun kendalana nyaéta mayit anu karék kapanggih tilu dinten saatos kajadian. Almarhum tiwas dinten rebo kaping 8 juli wengi, sedengkeun mayitna nembé kapendak dinten jumaah kaping 10 juli. 

Anu gaduh warung di sisi Dano Cavalio anu caket sareng lokasi kajadian, Amir Mahmud disuhunkeun kanggo ningalikeun péso saatos diangseu ku anying pelacak K9. Hal éta di dugikeun dina wawancara Pak Yusri Yunus dina Métro TV, senen, (20/7/2020).

Editor : Muhamad Hasanudin